Same da znate kak je teške biti đak! A najtežeše je v prvem razredu! Žmehka torba, a ja malji! Sad vam bom spripovedal kak je to išle po redu.

Se je bile dobre dek jen dan ni trebalo napisati zadaću! Ti, od crte do crte, vleči gor – vleči dol! Kakvi su to zadatki! Pa nesem ja bedak da bom same crte vlekel!  

E, onda su slova došla na red. Navek nas je vučitelka spitavala gde se čuje of glas, pa onaj glas. „G kao Gregurovec, Š kao škola.“

I nesem se baš navek mogel setiti! Ali ne bi ja bil ja da ne bi skužil njezine fore! Kak da ona baš sve zna! Videl sem v knjige da je kre svakoga slova sljika: I – igla,  A – auto. Juhu, super! Same si pogledam sljike i znam.

M-M-M – medo! „Bravo, Fabijane!“  Š-Š-Š – šešir!  „Izvrsno!!!“ O-O-O – birka! Opa! Grde me pogledala. „Nije birka, nego ovca!“ Dobre, nije, al ja vidim da je na sljike birka! P-P-P – cucek! „Nije cucek, nego pas!“ Sad me več živcera pomale! K-K-K – hiža! „Nije hiža nego kuća!“ E, zbilja nikoj ne zna! Kak nije hiža, gda je kak prava! Kakovi su to bedaki knjige pisali!

Onda sem počel paziti da govorim po književni. Veli mi Pero jen dan v škole „Ideme dime!“. Lepe sem ga ispravil. Ne veli se ideme dime, neg ideme kući!

 O matematiki bolje da vam ne pripovedam! Bile je dobre dek sme se vučili brojke i na plus i minus. To je nekak išle. E, onda su počeli nekakvi zadatki koj se trebale prečitati. A več sem vam spripovedal kak je to s čitanjem išle!

Čita nama vučitelka zadatak: „U jednom autobusu vozi se 8 putnika. Na prvoj stanici izašlo je troje, a ušlo šestero putnika. Na drugoj stanici izašlo je petero, a ušlo sedmero putnika. Na trećoj stanici izašlo je dvanaestero, a ušlo dvoje putnika. Koliko je putnika došlo na zadnju stanicu?“ Koj? Kak bi ja to znal! Pa nesem im ja karte cvikal!

Prve i prve, to more biti zadatak za gradsku decu. Gdo bi se pri nas tak celi dan napeljaval z autobusem? Orje se i seje šenica! Jedino ak je bil petek pa so ljudi išli na plac. Tak da ja nikak nesem mogel zadatak rešiti! A štel sem!

E, v likovnom mi ni bile para! Videl sem da vučitelka oče da mi crtame nekoj drugačije i neobično! Jemput sem nacrtal zelene sonce. Rekla je: „Prekrasno je i baš si kreativan“. Nesem joj štel reči da mi je sonce zelene jer mi je žota dimov ostala! I od onda sem pravi umjetnik!

Isto tak i v telesnom! Prvi sem bil v bežanju: pred pesima, pred materu, pred vučitelku. V skakanju prek plota, prek poteka, z kukuružnjaka. V bacanju kamena v šajbe, napoja pajcekom. Pravi šampion u svim disciplinami!

Dok me ovak poslušate sigurne si mislite kak sem navek norel i zločestoče spelaval dek sem išel v prvi razred. A ja sem vam bil tak dober, pravi mali anđelek! Jer, ne lake biti đak!

Emina Baričević